除咗英超，德甲今晚亦揭開戰幔！開鑼戰由法蘭克福主場火並拜仁慕尼黑。「法福」獲決心踢爭氣波嘅馬里奧葛斯加盟，攻力提昇，班霸拜仁更豪使1.5億歐元（約12億港元）大事擴軍，新兵沙迪奧文尼亦極速融入，加上雙方近年碰頭入局例快，1.5球嘅半場大咪錯過。

　　文尼撻著騷哥利

　　法蘭克福上季勇奪歐霸，藉此獲得今屆歐聯入場券，為咗應付多線作戰，球隊除咗簽入南特前鋒高路梅安尼，以及利華古遜前鋒艾拿利奧，亦獲得進攻中場馬里奧葛斯來投；呢位2014年世盃決賽為德國一箭定江山嘅英雄，近年效力荷甲燕豪芬表現有番起色，為力爭重返「日耳曼兵團」再戰年底舉行嘅世盃決賽周，今夏重返德甲加盟法蘭克福，斗心毋庸置疑，連同原班陣容包括菲臘高斯迪、鎌田大地、山度士波里等，攻力有保證。

　　經歷一段時間嘅轉會風波擾攘後，拜仁雖然留唔住王牌前鋒羅拔利雲度夫斯基，但佢哋今季斥資1.5億歐元大事增兵，獲得利物浦前鋒沙迪奧文尼、祖雲達斯中堅馬菲斯迪歷特等相繼加盟，陣容依然星光熠熠，同時令內部競爭更趨激烈。

　　拜仁於上周德超盃激戰RB萊比錫贏5比3，該仗文尼表現搶鏡攞到「士哥」，值得留意係拜仁5個入球均由唔同球員取得，連失去正選嘅利萊辛尼，後備落場都喺末段埋齋，大軍火力全開。睇番兩隊近7次交手，有5次半場開出2球或以上，可見大家於初段表現搶韁，半場大不容錯過。