今晚欧国盃重头戏，D组两大出线热门英格兰火併克罗地亚。今场係英格兰唯一一场9点开波赛事，英迷当然要捧场。英格兰坐拥主场之利，可望打高一班波，佢哋连热身赛近6仗全胜，状态一流；「格仔兵团」克罗地亚球员年龄偏大，而且近8场只获得两胜，一于热捧英格兰主胜。

　　英格兰喺D组被视为首名出线大热，除咗球员质素之外，最主要係佢哋3场分组赛都会喺主场出击，若然能够首名出线，除8强会喺罗马进行，其馀16强、4强到决赛都会喺英格兰举行。虽然原本容量达9万人嘅温布莱球场，因疫情只准坐22,500人，但总算有番啲人气，「三狮兵团」肯定会打高一班波，首战对实力相若嘅克罗地亚，当然力争3分，为首名出线打好基础。

　　今场係上届世盃4强战翻版，当时激战90分钟踢成1比1，克罗地亚凭文迪苏杰109分钟入波致胜。之后嘅欧国联两军再度同组，英军取得1胜1和成绩。时移世易，3年后嘅英格兰大军成熟唔少，相反「格仔兵团」阵容老化，当中主将莫迪历年届35岁，平均年龄为27.27岁，英军则为24.81岁，係24路大军中第二后生嘅球队。

　　「三狮兵团」近6仗全胜

　　正所谓「拳怕少壮」，充满朝气活力嘅英格兰，连同热身赛近6场全胜，反映状态一流，相反克罗地亚近8场只曾两胜，预计「三狮兵团」今仗会採取主动，而且领队修夫基近期改踢「4231」较为稳阵嘅阵式，后防唔易失波，相信首战可*求胜，顺利擸3分。