饱受压力嘅车路士，今晚英足盃第3圈主场斗乙组仔摩甘比，绝对係反弹好时机。车仔圣诞新年快车战绩麻麻，好彩佢哋近5次英足盃对非英超球队全胜，4次半场领先，今场绝对可以炒番场振奋士气，预料一开波就狂攻，捧1.5球半场大。（周日晚9时30分开赛）

　　车路士圣诞新年快车只得1胜1和3负，联赛已经跌到第9位，季初大洒金钱竟然换嚟咁嘅成绩，领队林柏特孭晒镬，更有指班主阿布拉莫域已经有微言，好彩今个礼拜英足盃只係对住乙组仔，可以畀呢名少帅喘息机会。车仔向来重视英足盃，上届更杀入决赛，佢哋面对低组别球队甚少甩拖，近5次对非英超球队全胜，其中4次领先半场，预计伤愈嘅薛耶治会踢足全场，上场联赛休息嘅谭美阿巴谦同后备上阵嘅赫臣奥杜尔亦会正选搏杀，半场可望入多几粒锁定胜局。

　　摩甘比状态成疑
　　摩甘比于英乙排第7，上圈喺主场亦只能凭互射12码淘汰非联球队索利赫尔摩尔，球队早前因有职球员确诊，自Boxing Day后再冇比赛，状态成疑。摩甘比今季曾经喺英联盃第3圈主场斗纽卡素，结果惨吞7蛋，半场已落后0比5，今场凶多吉少，半场大好路。