法甲重开有好戏！

法甲今晚重开，马会暂时未开盘，今轮焦点必定落喺圣伊天主场迎战巴黎圣日耳门（PSG）一战，皆因PSG有新帅普捷天奴首度领军，「肥普」赛前讲明唔单止要赢，仲要赢得有风格；圣伊天近5次交手全部输晒，当中4次上半场已落后，实力明显有距离，今场凶多吉少。

法甲喺圣诞、新年期间最瞩目嘅新闻当然係PSG换帅，上季带领球队成为国内3冠王、兼且历史性杀入欧联决赛嘅德国教头杜曹被炒，改由前热刺主帅普捷天奴接手，呢位阿根廷籍教头喺球员时代曾效力PSG兼做过队长，对法甲绝不陌生，而且队中仲有莫路伊卡迪、迪马利亚及里安度柏利迪斯等同乡球员，相信普帅好快可以适应新环境。

赢波之馀要踢出风格

普捷天奴执教生涯从未赢过正式锦标，最叻都係带领热刺攞过欧联及英联盃亚军，以目前PSG人脚相信可以帮佢摆脱「锦标荒」，不过「肥普」似乎知道冠军并唔能够完全满足球会高层，佢喺接受传媒访问时提到，自己唔单止要帮球队赢波，仲要踢出自己风格，呢点係佢回归PSG嘅最大目标，佢亦刻意澹化球员转会传闻，讲明未来会同主力*、基利安麦巴比等打好关係，以防出现「一朝天子一朝臣」嘅错觉，影响球队士气，今晚首度出征更加唔衰得。

圣伊天依家位处联赛榜中下游位置，近14场联赛仅得1胜，状态信唔过，加上佢哋近5次交手输晒，而且仅入1粒丧失16球，今番再遇PSG，睇怕都阻唔到普捷天奴赢波攞威。