2020/08/16

　　勝利船隊長 恩尼斯達

　　亞冠停擺益曬星級老將

　　周日日職大戰，有鹿島鹿角喺主場迎戰神戶勝利船，兩隊波目前只係排喺聯賽榜中下游位置，表現令球迷失望。鹿島鹿角近期征戰連場，體力受影響，而且仲要對住「剋星」神戶勝利船，注定冇運行，捧客勝。

　　鹿島鹿角傷疲交加

　　主隊鹿島鹿角近期各項賽事連贏2場，信心應該有所提昇，不過喺聯賽同日聯盃雙線作戰下，今場係佢哋12日內第4次上陣，縱使巴西籍教練薩高已經盡量作出輪換，但部份主力好似伊藤翔、白崎凌兵等都場場上陣，體能方面點都會輸蝕，加埋守衞町田浩樹黃牌夠數坐波監，上田綺世養傷，可能要用到染野唯月等「1年生」新秀戥腳。

　　神戶勝利船球員個人質素高，問題係平均年紀偏大，好在亞冠盃停戰，依家只係「一周一賽」，球隊可以集中火力，恩尼斯達、華美倫、戴恩費斯杜格拉斯等星級老將絕對可以輕易應付，表現更有保證。再者，神戶勝利船近年往績專剋鹿島鹿角，對上6次聯賽作客鹿島，竟然拎到5勝1和壓倒性成績，今年元旦日皇盃決賽亦淨勝對方兩球捧盃，30歲前鋒藤本憲明過去1年仲直接間接兩破鹿島大門，被譽為「鹿島殺手」，呢場波續追「客勝」好路。