话咁快欧国盃今晚展开第2轮分组赛，A组意大利主场迎战瑞士，虽然意大利喺揭幕战以3比0大胜土耳其，但攻门效率欠佳，打开纪录嗰球，都係靠对手摆乌龙，幸运成分唔低。至于瑞士以防守稳健见称，有力抵挡主队攻势，加上双方近5次对赛，上半场都打和，一于再追半场和。

意大利上场凭主场优势强攻土耳其，全场射门多达24次，但只有8次中目标，特别係上半场具威胁嘅攻门并唔多。直至下半场逼到土耳其中坚美列迪美罗摆乌龙，加上对手信心及体力都下跌之后，意大利先至得以连番射门得手，最终赢3比0。

赛程紧密或勒住踢

由于意大利已经有3分在手，出线形势乐观，今场冇必要太冒进，甚至打和亦冇坏，相信领队文仙尼会採取比较保守嘅踢法。事实上，意军喺「文Sir」执教后，虽然录得廿多场不败，但睇番佢哋唔係「狮子搏兔」强攻，每每係谋定而后动，搵到空位先靠恩莫比尼、恩斯治尼呢类技术型射手一剑封喉，因此「开波即抢」并唔係佢哋杯茶。再者，欧国盃决赛周赛程紧密，每支球队都唔可能场场都搏尽，意大利今场回一回气亦好正常。

另一边厢，瑞士一向都係守强攻弱嘅球队，从佢哋上届欧国盃3场分组赛只入2球及失1球，可见瑞士踢法非常保守，果然上场仅同威尔斯打和1比1，上半场互交白卷。

值得留意，瑞士上场对威尔斯係上周六举行，变相比意大利少1日时间休息，体力上难免输蚀。更何况瑞士今场作客应该会更倾向主守，预料上半场会係攻防战，开半场和机会较高。