今晚英超「双红会」补赛，曼联于奥脱福球场迎战利物浦。虽然呢场係「红魔鬼」7日内第4场，但「双红会」有别一般联赛，曼联肯定唔会放软手脚，必趁机减低利物浦杀入前4嘅机会；「红军」为免缺席下届欧联，作客照攻，2.5球入球大好路。

　　曼联刚于主场不敌李斯特城，隔一日又有比赛，但嗰场领队苏斯克查收起卡云尼、般奴费南迪斯及保罗普巴等多名主力，摆明让赛留力对付死敌利物浦，因为今场除咗係「双红会」之外，更係阻止「红军」杀入前4嘅好机会。

　　红军争前4冇得缩
　　随住曼联上仗「扶一扶」李城后，利物浦依家以34战57分排第6位，比第3位、多踢两场嘅李城少9分，而未计周中赛事，佢哋亦落后第4位兼打多1场嘅车路士7分，连同今仗「红军」只剩番4场联赛，只要曼联喺主场击败死敌，「红军」要追上前4难度极高。此外今场赛事原本就係因曼联球迷示威搞到延期，要凼番球迷，最好嘅方法当然係赢波落死敌面。

　　利物浦今季四大皆空，下届欧联入场券係最后救赎，佢哋最后3场分别作客西布朗及般尼，同主场对水晶宫，赢波难度唔高，只要今场能抢分而回，仍然有价讲，相信作客照攻。既然曼联近9次联赛主场，8次开3球或以上，2.5球入球大咪错过。