英格兰喺温布莱球场展开世界盃欧洲区外围赛I组之旅，首战对同组最弱嘅圣马力诺。世界排名210位嘅圣马力诺，长年都係列强点心，英格兰赢波全取3分绝对係轻鬆任务；翻查纪录，英格兰近6次斗圣马力诺攻入37球，平均每场有6球交收，半场炒得起呢队鱼腩，今场有得睇免费直播，玩少少3.5球半场大，为睇波增添乐趣。

　　国家队入波全民多1日假
　　圣马力诺係欧洲足协人口最少嘅国家，只得3万3千几人，住喺香港太古城嘅人口仲多过佢。圣马力诺国家队成员大部分係业馀球员，只有部分喺意丙或以下级别球会效力，实力同英格兰相差极远。

　　一直有报道指圣马力诺政府为鼓励国家队争取士哥，只要球队取得入球，全国国民就享有1日公众假期，真係谂起都兴奋，所以圣马力诺球员即使明知技不如人，落到场都经常尽力进攻，呢个全攻型战术亦对开入球大有利；圣马力诺入到波固然好，入唔到波亦因为后防空虚，畀到对手士哥机会。

　　炒惯对手轮换一样掂
　　英格兰上次斗圣马力诺係美好回忆，「三狮兵团」2015年9月5日欧洲国家盃外围赛作客大炒圣军6比0，提前取得决赛周资格，今次又喺世界盃外围赛遇到圣马力诺，认真「老利」，当然又要大胜番场。连同上述呢一仗，英军6次斗圣马力诺合共射入37球仅失1球，今场要再度大胜毫无难度。