今晚英超仲有西布朗主场迎战爱华顿，「拖肥糖」今季表现反传统，作客成绩远比主场好，近6场联赛作客取得5胜1和，包括打破宿命，近22年首次联赛作客击败同市死敌利物浦，试问联赛排尾二嘅西布朗又点抵挡得住呢？一于再追爱华顿客胜。

　　作客出击更醒神
　　西布朗今季表现持续低迷，就算搵咗艾拿戴斯做领队，但近况亦唔见好得几多，佢哋踢咗26场联赛仅获3胜，依家排联赛尾二，降班危机愈来愈大。虽然西布朗上场以1比0击败白礼顿，总算止一止血，但要留意该场白礼顿球员射失两个12码，而且有1次射入罚球，但被球证推翻唔计，引起争议。所以西布朗上场可以全取3分，绝对有幸运成份，今场对住实力强劲嘅爱华顿，恐怕未必可以继续「符碌」攞分。

　　另一边厢，爱华顿继击败利物浦之后，上场再赢埋修咸顿，取得两连胜兼不失球，球员信心即时爆升。最估唔到係「拖肥糖」今季作客发挥比喺主场更加出色，佢哋今季12场联赛作客获得26分，比主场多出9分。详细睇爱华顿作客赛果，更加会发现佢哋的确真材实料，所击败对手包括热刺、李斯特城、利物浦，以及打和曼联。爱华顿作客面对劲旅都未惊过，更何况今场对手只係鱼腩西布朗，相信3分可以袋袋平安，客胜咪错过。