頭場英超上演護級大戰，白禮頓主場迎戰西布朗，兩支球隊今季都以護級為目標，主隊白禮頓近3場聯賽只得1分，今仗回師主場必定搶攻；開季至今未贏過嘅西布朗，面對實力接近嘅對手亦希望爭響勝鼓，預料今場雙方以進取踢法求勝，中位數2.5球大開出機會高。

　　白禮頓今季表現其實唔差，主攻踢法亦甚得球迷歡心，主場2比3不敵曼聯、作客2比4輸畀愛華頓，2場輸波都有啲唔好彩。白禮頓前線有比利時國腳李安度杜沙特領軍，射手馬奧比亦有不俗入球能力，要沖破西布朗脆弱防線不成問題，不過白禮頓亦有中堅李維士鄧克停賽，失球同樣在所難免。連盃賽在內，白禮頓今季4場主場總入球全開3球或以上，今場隨時再演入球騷。

　　西布朗作客唔會死守

　　西布朗開季頭2場先後大敗畀李斯特城、愛華頓，近期表現已漸入佳境，主場3比3打和車路士一仗更屬代表作，今次對住同級對手白禮頓，肯定希望爭取今季第1場勝仗，作客亦不會死守求和，今場勢同白禮頓斗攻。