周二凌晨德甲獨腳戲，利華古遜主場斗奧格斯堡；開咧脫腳嘅利華上場歐霸盃主場狂數尼斯6比2，士氣、信心翻曬嚟，相反奧格斯堡上場被RB萊比錫打破聯賽不敗身，今場再斗剋星形勢唔樂觀，熱捧主勝。（周二凌晨3時30分開賽）

　　奧格斯堡斷纜影響信心

　　利華古遜今季放走夏維斯、禾蘭兩大進攻主力，開季頭4輪聯賽只得1勝，而且4場加埋僅入3球，表現唔算突出，不過佢哋上周中喺歐霸盃終於重拾射門鞋，主場出擊以6比2大勝法甲球隊尼斯，由於今場佢哋都係主場布陣，唔使擔心體力問題，勢必乘勝追擊。

　　奧格斯堡頭3輪聯賽2勝1和不敗，包括主場2比0擊敗奪標熱門之一嘅多蒙特，表現令人眼前一亮，可惜上周佢哋喺主場淨吞RB萊比錫兩蛋，今季聯賽首嘗敗績，恐對球員信心有影響。睇埋往績，奧格斯堡近4次聯賽對利華古遜全部輸曬，加埋失10球只入1球，作客搶分唔容易，捧利華古遜主勝最穩陣。