神鋒對決拖肥聖人做大騷

　　今晚英超頭場「聖人」修咸頓主場硬撼1哥愛華頓。今仗唔單止有兩軍「三獅」射手丹尼艾格斯同卡維特利雲正面交鋒，「拖肥」靈魂人物「J神」佔士洛迪古斯亦啱啱好番趕得切上陣，勢必火力全開，捧2.5球大盤最上算。

　　修咸頓近4場聯賽取得2勝1和1負，總算回穩，包括上輪作客逼和車路士3比3，韌力十足，英格蘭國腳丹尼艾格斯喺呢4場入4球，呢位上季英超「銀靴」保持射手觸覺，可望繼續數胡。愛華頓開季順風順水，全靠箭頭卡維特利雲瘋狂入波，佢踢5場聯賽已有7球進帳，仲勁過艾格斯，兩人都要爭取表現，保住喺「三獅兵團」嘅地位。

　　「J神」傷愈可望披甲

　　雖然愛華頓另一前鋒李察利臣上仗打吡領紅被逐要坐波監，嗰場受傷嘅「J神」一度被指繼續倦勤，好彩主帥安察洛堤尋日派定心丸，指佢已經好番可望披甲，多番呢位靈魂人物，「拖肥」繼續踢進攻足球，加上佢哋近7場全開3球或以上，捧2.5球嘅入球大仲穩陣。