講到今晚心水，不得不提日職「多摩川打吡」──FC東京主場對川崎前鋒。榜首FC東京冇咗「日本美斯」久保建英，一樣火力全開，挾主場4連勝之勢，今仗仲有得受讓咁筍，讓球主勝咪錯過。

　　FC東京今季能長居榜首，小將久保建英功不可沒，雖然呢位「日本美斯」已過檔皇馬，好彩仲有迪亞高奧利華拉橕住，佢近2場聯賽入3粒，打破自4月尾以來嘅入球荒，連同另一前鋒永井謙佑頻有士哥，難怪FC東京近2仗聯賽入7球，攻力未受影響，而且近4場主場贏曬堅惡。

　　近兩屆日職盟主嘅川崎前鋒，依家落後FC東京7分，為追分一定焗攻，但近5仗僅2捷，包括上仗被弱旅鳥棲砂岩悶和0比0，前鋒演出麻麻，作客要讓波唔多信得過，轉捧主場受讓兼弗爆嘅FC東京讓球主勝。