今晚女子世盃分組賽尾輪賽事，其中直播戲碼B組有中國女足硬撼西班牙女足。「鏗鏘玫瑰」為爭出線機會，面對同分嘅西班牙女足，仍會採取穩中求勝策略，加上王牌王霜復任正選，仲有得受讓必捧讓球主勝。

　　先講講B組形勢，德國女足2戰全勝以6分排榜首，西班牙女足與中國女足同得3分緊隨其後，「女狂牛」暫憑較佳得失球居次席，要知道除咗每組頭兩名可出線外，6組中4支最佳第3名亦可晉級16強。首輪輸波嘅中國女足，隨著上仗小勝南非女足1比0，今仗打和亦有機會成為其中一支最佳第3名，但仍要視乎其他組嘅情況而定，存在一定變數，為確保出線，最穩陣方法就係贏波。有傳與主帥賈秀全不和嘅主力王霜，上仗已復任正選，有助加強攻力。與中國女足一樣，西班牙女足同樣頭兩輪獲1勝1負，贏嗰場係反勝南非女足3比1，表現唔算標青，「鏗鏘玫瑰」一向防守穩健，有力頂住博偷雞，受讓必捧讓球主勝。