今晚英超迎來兩場焦點賽事，早場有氣勢如虹嘅「1哥」阿仙奴，作客護級分子愛華頓。「兵工廠」連挫熱刺、曼聯後士氣高昂，對家愛華頓有新帥戴治上任，為省招牌必搶攻，1.5球半場大抵玩。另邊廂，曼聯主場迎擊水晶宮。紅魔啱啱殺入英聯盃決賽，士氣大振，遇上狀態低迷嘅水晶宮，讓1/1.5球照捧上盤。

　　先講愛華頓主場迎戰阿仙奴，作客嘅英超「1哥」今季聯賽成績非常穩定，喺客場都有8勝1和1負，10場聯賽作客有7場保持清白身，演出極具說服力。阿仙奴上周喺英足盃作客輸畀曼城出局，但「兵工廠」該仗其實收起多名主力，明顯係想集中火力喺英超爭霸，預計今仗夫添出擊可以重拾霸氣。

　　阿仙奴前鋒加比爾捷西斯養傷，後備箭頭尼基迪亞擔正5場聯賽入4球，確保球隊火力依然強大，加上新兵李安度杜沙特、積及基奧柯同佐真奴都可以隨時候命，阿仙奴攻守實力同兵源再度提昇，食住個勢會先下手為強，睇番佢哋近4場聯賽，有3次半場總入球開2球或以上，球員極速撻著。

　　愛華頓新帥上任戰意增

　　愛華頓依家面對內懮外患，近4場賽事全敗，領隊林柏特被炒魷，改由前般尼主帥戴治領軍，新帥上場有助刺激球員戰意，就算明知實力唔及阿仙奴，早段仍然預期會盡力駁火，有望開出1.5球半場大。