周五澳職獨腳戲上演強弱懸殊之戰，上季雙料盟主FC悉尼主場迎戰近3季常規賽包尾嘅中岸水手，雖然兩隊近季成績差天共地，不過今季各隊之間距離似乎有所拉近，FC悉尼在王牌射手方祖離隊後，攻擊力大受削弱，要攻破防守硬淨嘅水手不易，捧好分頭嘅2.35倍半場和。

　　FC悉尼擁有連高域、魯克巴坦同安東尼卡沙利斯等好波之人，控制球賽能力屬澳職最強，可惜上季入超過20球嘅英格蘭前鋒方祖離隊，入球能力受到影響，上輪「悉尼打吡」亦僅靠一個爭議12碼先開紀錄，最終只能與西悉尼流浪者踢成1比1平手。FC悉尼前線未撻著，今季惟有踢得更穩陣，連亞冠盃賽事在內近3場比賽上半場都與對手打和。

　　中岸水手作客先求穩
　　中岸水手今季加入保沙歷等戰將後，實力有所提昇，上輪斗西悉尼流浪者，戰至下半場尾段才失陷，僅負0比1，開季3仗2勝1負只失1球，後防演出比過去幾季大有改善。水手整體實力不及FC悉尼，今場作客必定以穩守為先，有力頂住半場唔輸，半場和有2.35倍相當值博。