今晚英足盃第4圈獨腳戲，非聯賽球隊佐利主場越級挑戰英超嘅狼隊。佐利上圈勇挫英冠「綿羊」打比郡，信心爆棚，不過對住更高級別嘅狼隊唔易打；狼隊近期入得又失得，比賽初段經常產生大量入波，首選中位數1.5球嘅半場入球大。

　　佐利行運照樣駁火
　　佐利係今屆英足盃第4圈唯一非聯賽球隊，佢哋喺頭2圈先後反勝英甲嘅韋根及彼德堡，上圈主場面對英冠嘅打比郡，撞正對手受新冠肺炎疫情影響，全隊一隊職球員需要隔離，只能派青年軍出戰，實力大減，佐利最終爆冷贏2比0，真係行運行到落腳趾尾，前鋒乾拿荷爾喺呢3圈都有士哥，不容少覷。佐利今仗挑戰再高一級嘅狼隊，要延續神奇之旅絕不容易，但睇番佢哋近6仗有5次開3球或以上，單計呢3圈英足盃就攻入8粒，難得有機會與英超球隊過招，相信唔會太保守。

　　另邊廂，狼隊實力高幾班，惟近況欠佳，之前7仗贏得1場咁大把，包括上仗輸畀弱旅西布朗，而且7場比賽入面只有1場冇失波，防線唔穩陣，好彩佢哋進攻方面交到功課，對上4場共轟入7球，而且全部都喺上半場射入，有3次半場開2球或以上，呢場睇嚟都會一開波就搶攻，捧1.5球半場大好路。