非國盃4強大戰，周一凌晨阿爾及利亞斗尼日利亞。今季開局慢熱嘅「超霸鷹」愈踢愈弗，尤其前場幾位攻擊手開始上力，面對有多位主將上陣成疑嘅阿爾及利亞，有望取得佳績，平手盤捧尼日利亞。

　　阿爾及利亞上仗同科特迪瓦惡戰120分鍾都未分勝負，要靠12碼先至勉強晉級，體能消耗極大，未必及時回復到最佳狀態，該戰仲有入球功臣菲侯利同主力守將艾泰兩人齊齊因傷被調離場，好大機會缺席呢場大戰，冇咗佢哋，阿爾及利亞戰力肯定大打折扣，呢場隨時陷入被動。相反「超霸鷹」恩哈路、卓禾斯同伊禾比等人所組成嘅前場攻擊組合愈踢愈有默契，呢場有足夠實力玩強攻，加上尼日利亞近6次交手取5勝1和往績優勢明顯，呢場平手盤肯定捧尼日利亞。