求洗颓风落场砌到尽

今晚有场欧霸32强次回合提早一日上演，热刺主场斗奥地利球队禾夫斯贝加。热刺首回合喺中立场作赛赢4比1，今日又可以主场出击，真係着数到晕，既然集有利条件于一身，梗係想再赢多场一洗颓风。事实上，领队摩连奴盃赛用副选成绩仲好，个个都搏尽争取表现，佢哋近5场欧霸盃，有4次开4球或以上，一于再捧3.5球入球大。

分析呢场波，总会有一个疑问，热刺首回合赢紧4比1喎，次回合仲使唔使搏先？玩开波嘅朋友都知，踢波斗心好紧要，大幅领先唔代表冇斗心，今场波嘅意义唔係来自晋级16强，而係更广义嘅球队整体信心问题。

后备兵更加搏命

热刺近8场只係赢得2场，全队波信心跌到落谷底，难得今场明知食硬对手，当然要大胜番场冲喜一吓。而且佢哋今场多数用副选，效果可能仲好过正选班球星。首先呢班副选如卡路士云尼斯奥斯同加里夫巴利，已经喺之前盃赛证明咗自己，除咗依家欧霸盃半隻脚入咗16强，英联盃亦杀入决赛，难得担正梗係会搏命。另一方面，热刺常规正选哈利卡尼同孙兴民经过大半季后，难免踢到呆呆哋，畀佢哋休息叉吓电，甚至后备名单都唔落，反而对整体球队管理有正面作用，摩连奴係老江湖，相信都明白呢个道理。

禾夫斯贝加名不经传，今季难得嚟到欧洲大舞台，而且好大机会係最后一场，当然想攞番啲安慰奖，佢哋首回合都搵到入波，对住近11场10场都有失波嘅热刺后防，唔係冇机会，一于捧3.5球入球大。