艾斯禾夫教出摇滚足球

　　今晚英足盃独脚戏英冠韦甘比主场挑战热刺，表面睇嚟强弱悬殊，不过韦甘比领队艾斯禾夫本身係「Rock & Roll」爱好者，佢带韦甘比由英乙到今季升上英冠，咩风浪未见过，对热刺都唔会缩；热刺近况亦弗，惯于半场起手，有机会一开波就斗攻，推介1.5球半场大。

　　艾斯禾夫2012年9月以看守领队身份执教韦甘比，当时球队喺英乙排包尾，最终佢成功协助球队护级成功，球会喺2013年4月正式搵佢坐正，喺艾斯禾夫带领下，韦甘比2018年由英乙升上英甲，再喺旧年升上英冠。

　　热刺近7场半场有波入

　　留住长头髮嘅艾斯禾夫係Band友，带波都係用「Rock & Roll Never Die」理念，唔怕挑战困难，好识带动士气。韦甘比现时虽于英冠排包尾，但佢哋踢法「性感」，深得球迷喜爱。上圈英足盃主场以4比1淘汰英冠中游球队普雷斯顿，加上上周联赛对锡周三因对方有人中招取消，多咗时间休息，够体力同热刺斗攻。

　　讲到有Character，热刺领队摩连奴当然唔输蚀，佢喺盃赛对弱旅肯定出副选。不过热刺后备兵都有料到，上圈大炒非联赛球队马连，巴西前锋卡路士云尼斯奥斯就连中三元。唔好忘记仲有加里夫巴利，呢名威尔斯国脚早排畀「寸王」警告「想留低定返皇马」，落到场自然生生性性。

　　虽然今场热刺作客，但唔使担心佢哋会踢得保守，球队近7场作客赛事，全部半场都有波入，遇着踢法性感嘅韦甘比，半场好易开大。提一提大家，两队4年前喺英足盃第4圈碰头，当时韦甘比作客半场领先2比0，最终热刺先反胜4比3，当年带队咪就係艾斯禾夫囉，所以1.5球半场大放心捧场。