狼队防线穿窿
　　两支喺英足盃晋级嘅球队狼队同爱华顿今晚对碰，狼队一向以防守耍家闻名，但今季呢支笛吹唔响，后防甩漏甚多，近10场联赛场场失波，爱华顿经过一轮调整，伤疲尽起，今场可以夫添搏杀，平手盘捧「拖肥糖」。

　　狼队呢排真正係「攻不锐、守不稳」，自鲁尔占美尼斯养伤后，成个稳守突击体系好似崩溃咗咁，一向入波已经唔多，依家再死多啲火。前面冇咗进攻焦点，后边亦频频出现甩漏，领队纽奴不论用4人防线，抑或3中坚阵式，都冇咗上季铜牆铁壁嘅感觉，近10场联赛竟然全部有失球。

　　爱华顿上轮联赛主场不敌韦斯咸0比1，英超4连胜告终，但上周末英足盃加时淘汰洛达咸，算係及时反弹。其实爱华顿喺英超表现不俗，16战得29分排联赛第7，少踢一场之下只係落后榜首利物浦4分，严格来说，仍属争标分子之一。

　　「拖肥糖」今场最大优势，係佢哋克服晒所有伤停问题，领队安察洛堤可以排出最强阵容，占士洛迪古斯回归，同基菲尔施古臣组成双核中场，增加球队组织力，李察利臣嘅速度可助前锋卡维特利云冲击对手防线，加上佢哋近4场联赛作客，获3胜1和佳绩，爱华顿今场可坐和望赢。