周三凌晨英超下游大战，锡菲联将会喺主场迎战纽卡素。「包尾大幡」锡菲联今季最大问题係进攻乏力，今场遇上火力同样欠奉嘅纽卡素，比赛场面肯定唔太开放，2.5球嘅入球细值得留意。

　　上季升上英超嘅锡菲联，凭出色整体性踢法频频抢分，最终拎到联赛第9位，表现令人眼前一亮，可惜锡菲联今季大跌Watt，敬陪积分榜榜末。领队韦达虽然带领球队升班有功，但佢同球会管理层喺引援投入不足问题上面，分歧愈嚟愈严重，内部矛盾进一步影响球队发挥。锡菲联英超17场战罢，依然一胜难求，最大原因係入球能力严重不足，近4仗联赛仅入1球，联赛至今总共只攻入8球，係英超入球数字最少球队，今仗惟有靠后面死守博大雾。

　　「喜鹊」联赛作客旺细盘
　　纽卡素虽然同降班区仲有一定距离，但依然唔可以掉以轻心。今季新加盟嘅射手哥林威尔逊，联赛至今斩获8球，可惜其馀队友只有中场轩迪克射入多过一球，暴露球队入球板斧不足问题。早前不幸确诊新冠肺炎嘅辛特麦斯明，虽然已重返训练场，但缺阵多时状态难有保证。「喜鹊」今季作赛踢法明显较保守，7次联赛作客有6次开两球或以下，今场遇上火力疲弱嘅锡菲联，随时再演「闷波」，中位数2.5球入球细值博。