擅打整体战冇C朗都掂！

今晚欧联G组大战，祖云达斯主场火併巴塞隆拿。祖记向来擅打整体战，而且主场踢欧联特醒，就算王牌C朗未必出得都冇有怕。相反巴塞客场表现打折扣，啱啱喺国家打吡输波亦打击士气，平手盘梗係捧番祖记。

当欧联分组赛抽籤完毕，万众期待等睇C朗自离开皇马转投祖记后，再度与美斯交锋，可惜C朗确诊新冠肺炎，上周检测仍呈阳性反应，据闻赛前佢会再提交检测结果，但要赶及今场大战披甲有啲抿水。

不过祖记球迷其实唔使太担心，皆因新帅派路接手后更注重整体战，上场欧联面对恩师卢锡斯古领军嘅基辅戴拿模，C朗同样缺阵，兼有队长基亚连尼初段伤出，但祖记凭住艾华路莫拉达下半场省两粒，轻取基辅2比0打响头炮，日前意甲喺古达度、保罗戴巴拿先后射门中楣下，仅和维罗纳1比1坚唔抵，返主场实搵巴塞出气。

碧基坐波监巴塞防线开窿

巴塞今季表现麻麻，日前喺国家打吡主场更以1比3输畀皇马，冇晒面子之馀亦令军心不稳，新帅朗奴高文排阵屡遭质疑，队长美斯不断参与前场逼抢，令佢体能消耗比以前大，前面只得安素法迪开路，难怪呢位队长开咧后各项赛事入得2粒，仲要全部係12码，脚风欠顺。

何况「地上最强」客场战绩唔算标青，近5场欧联作客赢得2仗，相反祖记主场出击特别醒神，近7场欧联主场豪取6胜1负，包括击败马德里体育会及华伦西亚等西甲球队，巴塞今仗唔单止有中场菲腊比古天奴因伤缺阵，仲有中坚碧基坐波监，本来已唔稳阵嘅防线，势必暴露更多空位，祖记可乘虚而入，平手盘捧得过。