主力谷状态 幼齿够抢缰
　　近3届盟主曼城今晚喺英联盃第3圈登场，主场斗今季降落英冠嘅般尼茅夫。曼城习惯喺英联盃出大量副选同青年球员，但往往踢出活力同超水准，好似上届咁，除4强次回合因早早领先放软手脚，其馀5场早段就顺利先开纪录，今仗可照办煮碗。

　　曼城领队哥迪奥拿事先张扬，今场会起用大量青年军，再搭几位富经验但未操起状态嘅球员。「蓝月亮」近年沿用呢条方程式出战英联盃，成绩依然彪炳，连续3届捧盃而回。好似旧年咁，阿古路受伤休息咗一排，佢真正喺联赛复出前，就先喺联赛盃上过阵，今场马列斯亦好大机会倣效，呢位阿尔及利亚国脚之前中咗新冠肺炎缺席操练，今场正好畀机会佢寓赛于操，加上新兵费伦托利斯，曼城进攻火力依然咁勐。

　　事实上曼城喺英联盃就算出后生仔，佢哋为求上位，落到场都极度抢缰。以上届为例，曼城同由第3圈打起，6场英联盃除4强次回合因领先曼联3比1放软手脚，其馀5场一早就入波，4场开出半场大。

　　般尼茅夫踢法性感
　　今场对手般尼茅夫踢法性感，好可能同「蓝月亮」斗攻，曼城近5次喺主场斗般茅，4次半场总入球2球或以上，今晚半场实多波入。