喺巴西舉行嘅美洲國家盃聽朝上演另一場4強大戰，衞冕嘅智利惡斗奇兵秘魯。智利王牌阿歷斯山齊士（A山）一返國家隊即刻醒神，率領球隊逢關過關，其拍檔伊度亞度華加斯近年成為剋死秘魯嘅關鍵棋子，力爭3連冠嘅智利有力贏波闖決賽，讓平半捧上盤。

　　雖然阿歷斯山齊士加盟曼聯後，表現低迷為人詬病，但呢位翼鋒返回智利國家隊例必翻生，單計今屆美洲盃，就入咗2球兼交出1次助攻，愈打愈有信心，同喺紅魔鬼嗰陣可以話判若兩人。

　　秘魯死火交白卷多

　　「A山」、維達爾、加利美度、伊度亞度華加斯幾個智利兵合作多年，亦係呢支國家隊連續兩屆美洲盃封王嘅骨乾，論默契肯定贏曬。智利喺美洲盃C組雖然僅以次名出線，但上場8強面對B組「一哥」哥倫比亞不落下風，最終憑互射12碼勝出踢走對手，表現硬淨。現時智利士氣正盛，4強面對實力一般嘅秘魯，勢必搏盡爭勝。

　　力爭繼1975年後再次打入決賽嘅秘魯，喺今屆8強同樣藉互射12碼淘汰烏拉圭，但睇番佢哋今屆表現，法定時間僅得1勝，包括分組賽尾輪慘吞巴西5蛋，王牌法芬又因傷續抖，依家單靠老將荷西古里路數胡，點都差啲，難怪今屆4戰有3場交白卷。

　　睇埋兩軍近5次交手，智利取得4勝1負，伊度亞度華加斯喺當中4場有份上陣，3場梅開二度轟入6粒，堪稱秘魯剋星，智利有力連續3屆殺入決賽，今場小讓平半，上盤有買趁早。