英超冠军前哨战爆发！「1哥」阿仙奴周四凌晨主场迎战曼城，「兵工厂」今季一直长踞榜首，但近期状态明显回落，连续两场联赛都失分，领队阿迪达今仗对住师傅哥迪奥拿嘅曼城，无论兵力、状态同战术都被食住，想反弹难度极高，博曼城客胜更好路。

　　阿仙奴今季战绩突出，球队亦一直沿用「胜利11人」打天下，不过部分主力近期出现疲态，进攻速度明显减慢，令缺少加比尔捷西斯嘅锋线突然死火，近3场赛事只入过1球，踢出1和2负嘅3仗不胜走势，状态同信心都令人怀疑，以年轻球员为主嘅阿仙奴，未必可以驾驭呢场压力极大嘅关键战。

　　近6次对赛全胜
　　事实上，阿仙奴领队阿迪达虽然广受好评，但只有4年执教经验嘅佢，仍未经历过争冠压力，相反佢嘅师傅哥迪奥拿夺冠无数，相同嘅控球、组织战术比阿仙奴更加成熟，格食格下往往秤高一线，两队过去6次交手，曼城全部获胜，包括上月喺英足盃将阿仙奴踢出局。

　　曼城上轮3比1轻取阿士东维拉，依家只系落後3分，今场赢波就可以登上榜首，战意相当鲜明。王牌前锋艾宁夏兰特伤势无碍，以佢嘅制空力，可以克制阿仙奴近期唔太稳阵嘅後防，加上菲尔科顿伤愈复出，令球队如虎添翼，曼城客胜值得捧场。