今晚欧国联A2组首轮赛事，捷克主场迎战瑞士。捷克射手柏德列舒希克因伤落选，对进攻影响甚大，瑞士一向擅打守势波，唔识踢主攻，加上初段例必保守，半场和不妨再追。（周五凌晨2时45分开赛）

　　捷克虽有韦斯咸孖宝华迪美高法兰及汤马士苏锡克压阵，但王牌射手柏德列舒希克因伤未有入选，佢哋向来靠呢位利华古逊箭头数胡，冇咗佢差好远。除此之外，连般尼前锋马迪维达都冇份，只靠古查达及新仔阿当荷路锡担大旗，两人为捷克披甲夹埋入得一球咁大把，真系靠唔住。

　　「十字军」踢法保守

　　另一边厢，瑞士阵容比较完整，法比安舒哈、格列沙加、梳顿沙基利、史堤芬苏巴、比列安保路及施费洛域等悉数入选。「十字军」对亲强队常有佳作，上年欧国盃曾淘汰法国，早前世盃外更力压意大利，喺分组赛首名出线，皆因佢哋防守极有纪律，每每等啱时机策动反击，呢招对强队颇为奏效，不过面对实力次一级嘅对手，反而唔识得点样做主动进攻，就暴露出老鼠拉龟嘅问题。

　　虽然如此，瑞士无论对住乜嘢对手，都会以稳住防线为大前提，尤其於比赛初段例必保守，无论对手系英格兰定科索沃。连同热身赛在内，瑞士近4仗半场都同敌军握手言和，预计今仗作客捷克初段亦会陷於胶着，半场和捧得过。