澳职季后赛4强首回合大战，日前喺淘汰圈过关嘅西部联，先喺主场布阵迎战墨尔本胜利。两队喺常规赛分列第3同第2位，实力睇落接近，不过讲到近况就以墨尔本胜利明显占优，一众前锋火力全开，而且客队抖足10日、养精蓄锐嚟踢呢场大战，有力乘住强势开出客胜。

　　西部联喺3日前1比0险胜惠灵顿凤凰晋级，佢哋该仗早段领先后一直主守，最终顶到尾晋级。喺队长迪亚文迪膝伤提早收咧下，西部联嘅进攻未见锐利，对上4场比赛只有3个入波，常规赛最后3轮亦只录得1和2负成绩，可见球队喺兵源有限下，球员捱到季尾状态已下滑，连场硬仗令人担心。

　　墨尔本胜利喺常规赛以1分之微，不敌墨尔本城屈居亚军，但系球队季尾气势极强，联赛录得破球会纪录嘅连续15场不败，包括最近5仗拎到4胜1和佳绩。历克迪亚高斯天奴、积基比廉马、班顿咸美尔等脚风颇顺，球队对上5仗攻入14球，强大火力系等闲球队难以抵挡。正所谓宁买当头起，墨尔本胜利客胜值博。