喺周六朝早舉行嘅美職賽事，溫哥華白帽主場迎戰波特蘭伐木者。雖然雙方今季成績接近，但論近況溫哥華白帽更勝一籌，已經連續10場聯賽未輸過，挾近3仗主場贏曬強勢，今場有力再下一城，讓平半照捧上盤。

　　傷兵困擾惡唔出樣

　　溫哥華白帽依家排西岸第8位，僅落後第7位嘅波特蘭伐木者1分，實力可謂不相伯仲。事實上，白帽由於季初失分太多，導致排名相對以往較低，但呢支加拿大球隊已經愈戰愈勇，唔單止連續10場聯賽保持不敗，近4仗更加贏曬，單計主場更獲得3連勝，喺自己地頭出擊特醒。除此之外，3個月前新加盟嘅前鋒拜恩韋特表現出色，已經有4球進帳，加上迪巴卡些度、基思甸達祖美等進攻球員亦有唔錯發揮，白帽有力乘勝追擊。

　　至於波特蘭伐木者水平比較飄忽，近9場聯賽取得3勝2和4負，佢哋曾喺4月作客對住白帽，最終以0比1敗陣，更何況白帽依家狀態更弗，伐木者又有3位主將艾迪尼拿、安迪保路及艾歷威廉臣提早收咧，作客更難惡得出樣，白帽讓平半，上盤值得捧場。