新季美職聽朝開波
　　新季美職喺香港時間周六早上開鑼，開咧戰戲碼為侯斯頓戴拿模主場對聖荷西地震。今季美職又有新變動，新軍FC奧斯汀加盟於西岸角逐，西岸增至13隊，東岸則維持14隊，27路大軍進行34場常規賽，東西岸頭7名進身季後賽。

　　碧咸搵菲臘佬教國際邁亞密
　　由於疫情關係，3支加拿大球隊溫哥華白帽、FC多倫多同CF蒙特利爾，今季所有主場賽事移師美國境內進行，溫哥華白帽會用皇家鹽湖城做「掛名主場」，FC多倫多會同奧蘭多城共用主場，CF蒙特利爾則會借用國際邁亞密嘅主場。

　　講開國際邁亞密，上季佢哋首度參戰就殺入季後賽，今季班主「萬人迷」碧咸搵嚟老友菲臘尼維利做教練，「菲臘佬」係辭去英格蘭女子隊主帥一職拍住碧咸搵食，睇嚇會唔會有一番新景象。

　　至於美職開咧戰，侯斯頓戴拿模主場對聖荷西地震。戴拿模上季排西岸包尾，今季知恥近乎勇，首戰當然唔想衰，遇著地震認真行運。地震上季排西岸第8，雖然趕到季後賽尾班車，但常規賽共失51球，失球之多冠絕美職。翻查往績，戴拿模近4次主場斗地震全勝，每場最少入兩粒，今場有力破地震大門，主W要捧。