周五日職獨腳戲，北海道札幌岡薩多主場迎戰橫濱水手。岡薩多踢法有前冇後，尤其是主場更開放，咁嘅踢法好睇唔好食，遇著控球力強或防守反擊球隊就好蝕底；水手今季入球量下降，反而更注重防守，開季至今僅輸1仗，平手盤捧水手坐和望贏。

　　岡薩多今季聯賽及盃賽10場有8仗開3球或以上，當中有1場總入球「7+」及兩場總入球「6球」，相當誇張。不過10仗中岡薩多僅取4勝，有兩場勝仗為盃賽，兩場聯賽勝仗分別只係贏榜尾FC橫濱及昇班球隊福岡黃蜂，而且開季至今只有1場冇失波，後防有唔少漏洞。

　　岡薩多防線多甩漏
　　水手控球及防守上較岡薩多優勝得多，除咗開季淨吞川崎前鋒兩蛋之外，其馀聯賽及盃賽合共9仗保持不敗，當中6仗力保不失。然而水手近3仗攻力下降，上仗對弱旅仙臺維加泰竟被逼和0比0，前鋒仲川輝人開季至今仍未開齋入波，狀態低迷，幸好新晉射手前田大然表現日漸成熟，今季上位擔起球隊得分任務。

　　由於水手近期進攻啞火，今場單靠岡薩多一方進攻，玩入球大細較難預計。反而喺戰術上推算，水手防守堅韌，只要今仗保持不失便可立於不敗之地，再憑突擊喺甩漏頗多嘅岡薩多防線搵機會，平手盤捧番作客嘅水手啱數。