今晚英超獨戲腳，紐卡素主場迎戰阿士東維拉。深受降班威脅嘅紐卡素，近4場聯賽不勝，兩名主力攻擊手哥林威爾遜及辛特麥斯明缺陣影響甚大，阿士東維拉喺基亞利殊受傷下，進攻表現同樣下滑，近6場聯賽5次開2球或以下，今場捧2.5球入球細。

　　紐卡素因成績不濟造成內亂，領隊布魯士與中場馬特列治沖突，上場斗尾二嘅西布朗，呢名英格蘭中場只列後備，最終同西布朗互交白卷，球隊累積27戰27分，現時只比排17同18位嘅白禮頓及富咸多1分，陷入降班漩渦。

　　「喜鵲」本來一直喺中下游徘徊，但今季幫球隊射入10球嘅首席射手哥林威爾遜自2月開始受傷，球隊近4仗聯賽都贏唔到，合共只射入兩球，今場辛特麥斯明及米基爾阿米朗亦未能上陣，冇咗呢3位主力喺前線，攻力更加唔掂。然而，進攻死火惟有靠守，一號門將杜巴夫卡傷愈後表現冇走樣，有佢把關即使贏唔到，都唔會多失。

　　維拉訪聖佔士唔敢冒進
　　阿士東維拉近況亦唔好，上場同狼隊互交白卷後，現時排第9，距離歐洲賽席位愈來愈遠，英格蘭中場基亞利殊受傷缺陣係致命傷，維拉近6場聯賽5次開2球或以下。今場作客近況極差嘅紐卡素，原本係搶3分好時機，可惜維拉近12次作客聖佔士公園從未贏過，心理上有壓力，加上最近連安華艾加斯、貝特蘭查奧爾同辛臣都入曬十字軍，人腳捉襟見肘之下，預料今場亦唔敢輕舉妄動，睇准機會先至作致命一擊，而且連英冠在內，雙方近10次聯賽交手全開2球或以下，今場轉玩2.5球入球細好過。