今晚欧霸16强首回合，热刺主场迎战克罗地亚班霸萨格勒布戴拿模。热刺主帅摩连奴一改保守作风，今季入球已达百球大关，近期得到重用嘅「大圣爷」加里夫巴利，更成功挞着锋线，而且主场出战欧霸例必抢攻，2.5球嘅大盘更值博。

　　热刺主帅摩连奴成日畀人话Out，淨係识「泊大巴」死守再打反击，但随住日前联赛大胜水晶宫4比1后，呢支北伦敦球队成为今季5大联赛中，第2支于各项赛事攻入100球嘅球队，难怪摩佬懒寸咁话：「对于一支只识防守嘅球队嚟讲，呢个数字都算过得去啦！」热刺咁弗，主要原因係摩连奴同加里夫巴利冰释前嫌有关，睇番热刺近4仗全胜中，「大圣爷」轰入5球及交出1次助攻，同时亦挞番着哈利卡尼同孙兴民。对水晶宫之役「哈神」省两粒，其中1球由孙兴民助攻，两人今季第14次互相助攻入波，打破1994/95年度布力般嘅舒利亚拍瑟顿单季所创嘅13次英超纪录，加埋快翼卢卡斯莫拉，呢个「新进攻4人组」火力全开。

　　萨格勒布戴拿模作客斗攻
　　克罗地亚1哥萨格勒布戴拿模，各项赛事连赢8场，就算单计欧霸，亦已取得6连胜，其中般奴比高域于今届欧霸已入4粒，包括上圈32强对卡斯洛达梅开二度，气势如虹，绝对唔怕热刺。睇番热刺主场出击特别进取，近11仗欧霸主场共轰35球，有10场开3球或以上，相信今仗都係斗攻格局，2.5球嘅大盘趁早买。