今晚另一场欧联16强次回合，多蒙特返主场再斗西维尔。多蒙特于首回合反胜3比2，功臣箭头艾宁夏兰特今季场均入1球，效率奇高，落后嘅西维尔更不能坐以待毙，但谷得太前，随时益晒反击锐利嘅「蜜蜂兵团」，挟近6场欧联5胜之势，主胜捧得过。

　　多蒙特箭头艾宁夏兰特勇达巅峰，首回合梅开二度，协助球队反胜西维尔3比2，呢位神童唔单止今届欧联已累积8球，位居射手榜榜首，连埋日前不敌拜仁之役梅开二度，今季29场正式比赛入29粒，脚风顺到冇朋友，虽然佢对拜仁嗰场伤出，但预计冇乜大碍，今仗可复出搏杀。中途接手嘅主帅泰锡，首回合改用4321嘅「圣诞树阵式」，3人中场达侯特、安利简恩及祖迪比宁咸覆盖范围大，有助平衡攻守，达侯特更有士哥，证明变阵奏效。

　　西维尔当黑走晒样
　　西维尔近期头头碰着黑，先喺欧联首回合反胜为败，上周中于西盃4强次回合畀巴塞淘汰，日前联赛仲输埋畀艾尔切，各项赛事近5场4度落败，与之前8连胜相比，状态走晒样。西维尔依家落后之馀，仲畀多蒙特抢到3个作客入球，今场一定要大举进攻，先有机会晋级，但连同分组赛在内，西维尔连续5场欧联均未能保持清白之身，共失11粒，焗攻之下随时令防线穿窿，畀擅于反击嘅多蒙特有机可乘。加上「蜜蜂兵团」近6场欧联，取得5胜1和未输过，今仗赢埋唔奇，主胜有计。