周五澳職大戰，阿德萊德聯主場迎戰紐卡素噴射機，主隊近期氣勢如虹，兼且有新兵加入同傷將復出，火力大大提昇，勢必繼續主攻踢法，今仗可望再展示強大鋒力，2.5球嘅入球大必捧！

　　阿德萊德聯開季表現飄忽，不過隨住球隊磨合同人腳齊整，開始發揮出真正威力，近2輪接連擊敗中岸水手同西悉尼流浪者兩支前列球隊，而且合共轟入6球。星級前鋒杜米祖歷早前對中岸水手連中三元，上仗作客西悉尼流浪者雖因傷缺陣，但由沙特阿拉伯聯賽回流嘅奇治葛雲，首演即貢獻1入波同1助攻，帶領球隊3比2再贏一仗，16歲超級新人穆罕默德托尼喺呢場賽事亦攻入今季個人第3球，表現精彩。

　　近仗交手入波多
　　目前嘅阿德萊德聯進攻力強勁，但防守平庸，尤其係米高積及臣、乾斯坦度普路斯同賴恩史達恩等中後場球員養傷下，要保住唔失波甚為困難，因此佢哋以攻為守，造就近5場聯賽總入球全開3球或以上，即使近2場勝仗亦各失2球，明顯用更多入球彌補防線不穩嘅缺點。

　　噴射機經歷5場不敗走勢後，上仗主場吞威靈頓鳳凰2蛋，氣勢慘被打斷，今仗當然會力求重振雄風。兩隊近3次交鋒均踢得開放，近3次對賽總入球全開3球或以上，大盤值得再追。