周六凌晨德甲獨腳戲，有雲達不來梅主場迎戰科隆。上季驚險護級成功嘅雲達不來梅，開季表現唔錯，尤其防守表現相當穩定，係球隊近5場聯賽不敗主要原因。作客嘅科隆呢季仍未開齋，不過近期演出開始有起色，今場有力同雲達不來梅周旋，雙方實力差距唔大，上半場開和機會極高。

　　雲達不來梅自開鑼戰慘敗後，隨即整頓防線，連續5場聯賽保持不敗，不過近3仗都只能夠同對手打和，最大打擊係今季已入4球嘅首席射手富克洛小腿受傷缺陣，令入球能力大受削弱，缺少呢位王牌前鋒壓陣，雲達不來梅自然要踢得更加穩陣，難怪佢哋近3場聯賽都喺半場打和。

　　科隆斗心足有力周旋
　　科隆開季6戰只得2分排尾3，今季仍未打開勝利之門，不過佢哋上場輸畀拜仁慕尼黑，球員充滿斗志嘅表現仍值得一讚。事實上，科隆今季雖然4次落敗，但有3場僅輸1球，可見並非不堪一擊，今場面對實力接近嘅不來梅可望踢成均勢，半場和值得留意。