今晚西甲獨腳戲，艾爾切主場斗切爾達；作為新昇班球隊，艾爾切今季成績合格有馀，不過主場入球能力依然有待改進；切爾達今季8場聯賽僅入5球，亦係目前西甲進攻火力最弱球隊之一，兩軍交手唔慌多波入，首選2.5球入球細。

　　艾爾切攻弱守強
　　新昇班嘅艾爾切開季6戰3勝1和2負得10分，現穩站聯賽榜中游位置，雖然上場佢哋作客1比3輸畀貝迪斯，聯賽4場不敗告終，不過睇番之前4場聯賽佢哋有3場保持清白身，防守唔算曳，唯一可以挑剔係前線鋒力不足，頭3輪主場聯賽有2場交白卷，欠缺進攻板斧，相信呢場都係繼續以守代攻。

　　切爾達今季8場聯賽1勝3和4負，現以6分排第17位，成績唔算理想，佢哋今季聯賽只入5球，當中4球嚟自伊亞高艾斯巴斯，論攻力唔會好得過艾爾切；由於切爾達賽程編排失利，頭4輪聯賽主場要對巴塞、馬體會及現排榜首嘅皇家蘇斯達，最終只得1勝3負，僅能擊敗今季跌Watt嘅華倫西亞，反而作客出戰不敗率更高，4戰取得3和1負，今場未必冇得打，既然切爾達今季4場聯賽作客都開2球或以下，今場捧細最好路。