聽朝美職有西岸前列對決，榜首西雅圖海灣者主場惡斗排次席的波特蘭伐木者。傷兵滿營嘅海灣者近期明顯跌Watt，反觀伐木者近8仗聯賽僅1敗，今場唔赦海灣者，受讓必捧讓球客勝。

　　查實雙方依家同分，打少1場嘅海灣者以較佳得失球暫居西岸榜首，不過佢哋勁多傷兵，除咗丹尼利華、祖雲锺斯、特雷梅斯續抖外，前鋒雷迪亞斯早前確診新冠肺炎，自10月頭為秘魯出戰熱身賽對巴拉圭後，需要隔離而未有披甲，今仗未必趕得及復出，冇咗呢位已入9球嘅首席射手，佐敦摩利斯喺前線孤掌難鳴，海灣者亦開始走樣，近2仗聯賽只得1和1負，令人失望。

　　攻擊點多火力全開

　　伐木者雖然近況有啲回落，同樣近2仗不勝，不過佢哋勝在攻擊點分散，菲臘比摩拉、伊保比斯、尼斯高達及華拿里輪流發威，合共入咗27球，可見佢哋火力全開。

　　睇番伐木者近8仗聯賽取得5勝2和僅1敗，若果單計作客，佢哋開咧9仗5勝2和2負，係西岸客場成績最好嘅球隊，硬淨唔易輸，為爭西岸1哥之位唔會腳軟，今場受讓一於捧讓球客勝。