蔚山今季於各項賽事20戰獲16勝3和1負，唯一輸波係輸畀聯賽勁敵全北汽車，而且佢哋聯賽連盃賽近11場10勝1和，整體水准好穩定。雖然因為下一輪要火併全北，蔚山今場可能變陣留力，中場大腦尹比加林多數繼續休息，比安莊臣就會擔任箭頭，已有21球進帳嘅巴西射手祖利亞尼加奧，或者下半場至出擊，即使係咁，以「老虎」嘅雄厚班底加埋主場之利，數兩三球唔難。

　　光州防守弱失波多

　　FC光州上場6比4作客大勝ＦＣ大邱，展現出力量同速度嘅優點，不過單場失4球，亦暴露咗後防不穩毛病。事實上，光州今季18場聯賽只有3場冇失波，加埋失咗27球，未計今輪比賽前，係ＦＣ首爾以外，韓職失波第2多球隊之一。最重要一點係，光州入球泉源集中喺前鋒菲臘比迪蘇沙身上，據講蔚山會起用身高1.87米、外號「奇誠庸第二」嘅22歲中場元斗才，箝制呢位入咗10球嘅巴西長人，令光州更難偷雞。

　　睇番數據，蔚山18次同ＦＣ光州交手，只得2015年輸過一次，無疑雙方近5次對戰，冇一隊能夠入對手多過1球，不過此一時彼一時，蔚山近10次贏波有7次能夠淨勝對手2球或以上，光州防守缺陷明顯，一於捧讓球主勝。