今晚德甲獨腳戲，格雷特霍夫主場迎戰榜首拜仁慕尼黑。拜仁今季連場大炒對手，射手羅拔利雲度夫斯基弗到漏油，遇著魚腩格雷特霍夫梗係要盡情數胡，為剛奪歐洲金靴獎助興，4.5球嘅大盤值得捧場。

　　拜仁今季保持強勢，唔單止聯賽位居榜首，歐聯首輪亦大炒巴塞隆拿3粒，以「羅拔佬」為首嘅鋒線狀態大勇，各項賽事近6仗贏曬之餘，合共轟入34球，5仗開5球或以上，其中上輪狂數昇班球隊波琴7比0，除咗1球係對手擺烏龍外，其餘6球分別由5位球員取得，包括甘美治梅開二度，攻擊點眾多火力全開。

　　「羅拔佬」數胡賀拎獎

　　「羅拔佬」日前先領取上季歐洲金靴獎，佢跨季連續19場正式比賽為拜仁入波，共轟30粒，今場自然要入多幾粒慶祝。反觀格雷特霍夫昇班後5輪聯賽僅得1和4負，共失13球，防線猶如不設防，點睇都頂唔到拜仁狂轟猛炸，既然客勝冇肉食，轉捧中位數4.5球嘅入球大更佳。