意甲周六凌晨有場護級大戰，卡利亞里主場對拖連奴，兩隊近排都唔識贏，卡利亞里近15場賽事未嘗1勝，近5場更只入1球。至於拖連奴屬於「和波專家」，近5場聯賽都打和，雙方都欠缺取勝把握。考慮到卡利亞里近5場比賽總入球都係2球或以下，一於再追中位數2.5球入球細。

　　祖奧柏度腳風欠順
　　卡利亞里排尾3，位處降班區，落後尾4嘅拖連奴2分，照計應該把握機會贏取今場護級「6分波」。問題係卡利亞里實力及狀態都非常差，計曬聯賽及盃賽，近15場比賽未贏過，只有5和10負，而且入球能力非常低，近7場有5場未能取得入球，好大程度因為球隊太依賴祖奧柏度入波，但呢位巴西中場腳風唔順，近6場聯賽僅有1球進帳，連帶球隊都啞火，今場想贏波都有心無力。

　　另一邊廂，拖連奴上月改由尼高拿執教之後，表現仍然冇起色，繼續保持「和波專家」風格，加上今場作客，為免輸波被卡利亞里反超前，相信更加唔會冒進，即使打和都冇壞。以拖連奴上場主場同熱拿亞悶和0比0嘅表現，預料今場又會係一場拉鋸戰，入球細值博。