英超球队热刺喺欧霸32强首回合到访中立场匈牙利嘅布达佩斯，面对挂名「主场」嘅奥地利球队禾夫斯贝加。热刺近况坚曳，急需赢波反弹，后备箭头卡路士云尼斯奥斯今届欧霸屡有斩获，可惜防线欠稳，今仗宁捧入球大。

　　热刺近况颓到爆，连同日前联赛淨吞曼城3蛋，各项赛事近6仗于法定时间仅1胜，今仗只斗实力较弱嘅禾夫斯贝加，梗係想赢番场漂亮嘅胜仗冲喜。虽然队长哈利卡尼伤愈后状态唔错，但安全起见今仗未必担正，好彩后备箭头卡路士云尼斯奥斯交足货，今届欧霸已入3粒同交出3次助攻，而同主帅摩连奴不和嘅「大圣爷」加里夫巴利，亦想趁机争取表现，睇番呢支北伦敦球队近10仗欧霸，有8次开3球或以上，就算单计今届欧霸，连同外围赛在内9战轰27粒，火力强劲。

　　不过热刺嘅防线可用灾难级嚟形容，尤其係防中出身、近年改任中坚嘅艾历迪亚不时自爆，预判力、出脚准绳度奇差，令后防经常失冤枉波，各项赛事近9仗只得1场冇失波，单计近2仗竟狂失8粒，令注重防守嘅主帅摩连奴冇晒飞士。

　　禾夫斯贝加唔係鱼腩
　　另边厢，禾夫斯贝加虽然名不经传，但呢支目前喺奥甲排第6嘅球队，于K组分组赛6战取得3胜1和2负，骑住飞燕诺同莫斯科中央陆军以次名出线，中场老将连达尔亦攻入4粒，绝对唔係「鱼腩」，热刺首回合牌面唔係赢硬，转捧2.5球入球大好过。