今晚西甲补赛，「小蝙蝠」利云特主场硬撼「1哥」马德里体育会。利云特啱啱输波洩咗道气，未必即刻谷得番起，相反马体会愈赢愈有，「复仇者」苏亚雷斯更士哥不断，韧力十足，为进一步甩开皇马同巴塞，今仗唔会留手，肯定豪派「利是」，客胜有计。

　　利云特虽然只排中游，但非常硬淨唔易输，近17仗联赛只係输过3场，其中包括维拉利尔同巴塞，不过睇番佢哋近6仗联赛只赢2场，明显有回落迹象，上仗不敌奥沙辛拿表现认真麻麻，啱啱同球队续约嘅中场重心荷西摩拉利斯，仲射失12码，咁样输波难免打窒道气。

　　苏亚雷斯愈踢愈有
　　讲到硬淨，马体会更胜一筹，今季21场联赛取得17胜3和仅1败，咁啱同主帅施蒙尼喺2013-14年度带队夺冠球季头21轮战绩一模一样，绝对係好兆头，而单计近10仗联赛，更豪取9胜1和佳绩，当中不乏反胜伊巴、华伦西亚同卡迪斯等恶战，硬淨到晕。今季被巴塞嫌老放弃嘅箭头苏亚雷斯，来到马体会重拾佳态，依家以16球位居射手榜榜首，球迷唔善忘嘅话，都记得「床单兵团」7年前勇夺西甲冠军嗰季，巧合地都有一位被巴塞放弃嘅前锋韦拿加盟，正所谓人要面树要皮，「阿苏」犹如韦拿般「复仇者」上身，誓要剥巴塞棚牙，呢种战意唔讲笑。仲有门神奥比历屡救险球，攻守都有保证。

　　翻查纪录，双方近6次交手，马体会取得5胜1和，摆明格食格，依家佢哋比皇马、巴塞打少2场及1场，领先5分及8分，若果今仗再赢，就会再扩大领先优势，进一步增加夺冠机会，客胜不容错过。