今晚西甲獨腳戲，卡迪斯主場火併畢爾包。卡迪斯近期「有球必應」，今仗仲有馬高斯莫路坐波監，勢*路大開；畢爾包有老將魯爾加西亞刑滿復出，攻力復整，但衰在客場例腳軟，新正頭大吉大利，轉捧2.5球嘅大盤更穩陣。

　　今季昇班嘅卡迪斯，因為曾勇挫皇馬同巴塞而一度響朵，但同時亦令列強有所防范，單計聯賽，近10仗只贏得1場。而且防線仲愈來愈脆弱，近5仗聯賽狂失14粒，全開3球或以上，上仗作客皇家蘇斯達，仲有中堅馬高斯莫路於半場前被逐，以寡敵眾下最終大敗1比4，而馬高斯莫路今仗亦要停賽，隨時繼續不設防。

　　畢爾包有前冇後
　　今年易帥後有起色嘅畢爾包，自捧走西超盃後開始有回落跡象，近4仗只得3和1負未贏過。雖然蒙尼恩及維拿利巴因傷倦勤，但新帥馬些連奴堅持進攻打法，自佢接手後，各項賽事11仗場場有波入，共入20粒，但同時連續10仗有失波，其中6仗作客或中立場賽事，有5仗開3球或以上，可見佢哋絕不龜縮，加上老將魯爾加西亞坐完波監，有利進攻。睇番呢支「巴斯克雄獅」今季10仗聯賽作客，只得1勝3和6負，未脫客場蟲特點，寧捧2.5球嘅大盤。