今晚歐霸盃J組賽事，英超「Big 6」熱刺主場迎戰奧地利球會寧斯。熱刺今季大踢性感足球，哈利卡尼伙拍孫興民（圖）入波當食生菜，不過後防演出飄忽，可望續演入球騷，中位數2.5球大盤必捧！

　　熱刺今季由歐霸盃第2圈外圍賽開始打起，就算對手實力唔強都冇乜留力，一直以主攻踢法「恰」對手。雖然前3圈賽事都有失球，但3場總共入咗12粒。睇番佢哋過去4場歐霸盃賽事，總入球全達3球或以上，今場可望照辦煮碗。

　　卡尼+孫興民=入波保證

　　熱刺今季喺英超同樣入得失得，試過5比2大勝修咸頓、6比1狂數曼聯，上輪同韋斯咸亦激和3比3；哈利卡尼同孫興民呢對組合大爆發，今季各項賽事合共交出18個入波，威力驚人，回巢嘅加里夫巴利經過上場磨合後，今晚亦有望正選上陣，更添火力。

　　奧地利勁旅寧斯上季曾殺入歐霸盃16強，但當時對住曼聯毫無招架之力，兩回合合計以1比7慘敗出局，今場面對火力全開嘅熱刺，大盤機會高唱入雲。