今晚阿King以非洲國家盃8強戰為重心，其中頭場科特迪瓦對阿爾及利亞最有睇頭。科特迪瓦不復當年勇，各自為戰冇隊形可言，相反有王牌馬列斯領軍嘅阿爾及利亞，4戰全勝頗具冠軍相，今場小讓平半，一於捧上盤。

　　科特迪瓦乃前屆非國盃盟主，但喺杜奧巴、耶耶托尼等相繼退出國家隊後，上屆竟於分組賽出局，今屆雖有韋費特沙夏、於法甲里爾爆出嘅尼高拉斯比比等助陣，4戰取得3勝1負，睇落唔曳，但場場波都冇乜整體配合，好似16強對馬里，全因對方後防一次犯錯，畀沙夏偷雞攻入致勝球，表現唔算標青。另一邊廂，阿爾及利亞有曼城翼鋒馬列斯擔大旗，無論正選嘅保利查、後備嘅施利文尼及阿當奧拿斯均交足貨，今屆4戰贏曬之馀，轟9球兼保持清白之身，攻守兼備，論整體表現，遠勝要靠沙夏單天保至尊嘅「大象兵團」，讓平半亦好合理，上盤趁早買。