美洲國家盃8強戰聽朝揭開戰幔，打頭陣有東道主巴西迎戰巴拉圭。「森巴兵團」已經上曬力，以菲臘比古天奴、羅拔圖法明奴為首嘅鋒線火力全開，無堅不摧，巴拉圭今屆3戰未贏過都入到淘汰賽，純粹好彩，撞正弗爆東道主難有運行，巴西就算讓兩球照捧讓球主勝。

　　艾華頓索拉斯新星上位

　　冇尼馬使乜驚呀！雖然美洲盃開幕前有王牌尼馬因傷退隊，但巴西主帥迪迪應變能力都算快，先用菲臘比古天奴做進攻核心，之前佢效力利物浦時勁夾嘅羅拔圖法明奴，亦力壓「耶穌」加比爾捷西斯獲得擔正機會。兩人故劍重逢默契十足，慳番磨合時間，巴西喺A組3場分組賽取得2勝1和，共轟8粒兼冇失過波，淨係佢兩個夾埋入咗3球兼交出3次助攻，全面激活森巴鋒線。

　　巴拉圭冇料到僥倖晉級

　　對於迪迪嚟講，今屆最大發現一定係艾華頓索拉斯，呢位甘美奧翼鋒因為愈打愈好，已經由後備打到變正選，而且今屆已有兩球進帳，包括揭幕戰對玻利維亞嘅世界波，堅係Sharp醒。連同臨時代替尼馬入伍嘅韋利安，上仗大勝秘魯5比0之役後備入替亦轟入靚波，「森巴兵團」幾支大炮已經撻著曬，火力唔講得笑。

　　另一邊廂，巴拉圭表現相對令人失望，今屆喺B組3場分組賽只得2和1負，若非C組嘅日本喺尾輪贏唔到，巴拉圭已經執包袱走人喇！事實上，佢哋仲要靠36歲老將奧斯卡卡度素數胡，明顯仍處於青黃不接階段，1場不勝都成為其中1支最佳第3名出線，幸運成分蓋過球隊實力，但好運嘅嘢可一不可再，遇上劍指冠軍、近3仗有2次贏3球或以上嘅巴西，巴拉圭相信難逃大敗命運，「森巴兵團」讓兩球都冇有怕，直取讓球主勝。