周一早上美洲國家盃C組賽事，烏拉圭對厄瓜多爾。老帥泰巴尼斯帶領嘅烏拉圭一向以鐵血防守見稱，唔會畀厄瓜多爾過多進攻機會之馀，首戰亦好可能先貫徹穩打穩紮踢法，中位數2.5球嘅入球細值得留意。

　　烏拉圭上屆未能喺小組出線，表現頗令人失望，可幸去到2018世界盃成功闖入8強，挽回面子。作為美洲盃史上奪冠次數最多（15次）嘅球隊，烏拉圭今屆強陣出擊，絕對係沖擊冠軍寶座嘅有力挑戰者，其中老帥泰巴尼斯除咗倚重蘇亞雷斯、卡雲尼等經驗豐富戰將外，亦繼世盃後，續用包括盧卡斯托拉拿同賓坦古亞等多位年輕球員，取得不俗效果，呢場佢哋有望繼續成為球隊中場主力。

　　近屆分組賽少波入

　　不過要數烏拉圭最引以為傲嘅，非一條鐵血防線莫屬，尤其隊長高甸同荷西基文尼斯長期喺西甲聯賽搵食，經驗豐富，有佢哋坐鎮，後防可以話穩如泰山，厄瓜多爾要入波真係唔係咁易。

　　厄瓜多爾除隊長路爾斯華倫西亞長期喺英超征戰之外，其馀大部分球員都喺美洲各地聯賽效力，整體實力一般，加上佢哋2019年踢咗4場友賽，竟然一場都未贏過，當中有兩場冇入波，前線令人擔心，似乎難對烏拉圭構成威脅。睇番烏拉圭近9場美洲盃分組賽，有7次開2球或以下，料今仗會堅持穩打穩紮踢法，中位數2.5球嘅入球細唔好錯過。