今午日皇盃第2圈赛事上演「胜利对决」，神户胜利船主场迎战富山胜利。胜利船渐有起色，落选「蓝武士」嘅两大前锋武藤嘉纪同大迫勇也要踢争气波，今仗誓搵丙组仔祭旗，加上近年於日皇盃例打闪击战，半场主胜值得捧场。（周三下午5时开赛）

坐拥「小白」恩尼斯达等球星嘅胜利船，今季出闸脱脚，头11仗联赛竟然未赢过，一度沦为包尾。好彩之後换帅，搵咗西班牙老帅洛迪拿接手，总算止跌回升，先喺亚冠盃分组赛出线，返到联赛近5仗取得2胜1和2负，包括日前大炒北海道札幌冈萨多4比1，信心渐复。

大迫勇也踢争气波

值得一提嘅，系日本今轮国际赛期，并冇召入任何胜利船球员，除咗武藤嘉纪冇份外，被视为主帅森保一「契仔」嘅大迫勇也亦名落孙山，令人意外。虽然日本有试阵味道，不过今次入选嘅外流前锋前田大然、古桥亨梧、浅野拓磨都有明显进步，而大迫勇也今季各项赛事入得4粒咁大把，再唔加把劲，其「蓝武士」首席中锋地位随时不保。

富山胜利尽管近期连场报捷，但毕竟佢哋只系日丙球队，实力同胜利船仍争几条街，何况佢哋近年於日皇盃遇上日职球队，例如浦和红钻、鹿岛鹿角、大阪樱花同今仗对手胜利船，全部都输波收场，遇强即屈。睇番胜利船近5仗日皇盃有4次半场领先，况且今季联赛表现仍属差强人意，必定博喺盃赛发围，遇弱定必一开波即抢攻，半场主胜有。