今晚英超尾场，阿士东维拉主场硬撼热刺。维拉连战连败，明显虚火已过，相反热刺近6仗联赛赢5场，气势如虹，难得依家升上第4位，为争下届欧联入场券，必定食住个势争胜，热刺今场让平半，上盘值得捧场。

　　维拉虚火已过等劏

　　阿士东维拉今季喺主帅谢拉特中途上任，并於冬窗借得巴塞中场菲腊比古天奴後，一度止跌回升。可惜随着古天奴跌Watt，佢哋亦走势回落，近3仗全部输晒，其中上仗以1比2不敌狼队，先有主力左闸卢卡斯迪治尼伤出，而入替佢嘅老将艾舒利杨格仲摆埋乌龙添，除咗射手奥尼屈坚斯保持水准外，其余前锋丹尼艾格斯、里安拜尼等均忘带射门鞋，令球队陷入攻不锐、守不稳嘅困局。

　　相反，热刺弗到冇朋友，近6仗联赛豪取5胜1负，只系输过畀有C朗连中三元嘅曼联，合共轰入21粒，单系前锋孖宝哈利卡尼及孙兴民便占咗10球，而借将翼锋古路施夫斯基更极速融入，3叉戟愈战愈勇，上仗面对纽卡素，哈利卡尼虽然冇士哥，但不断堕後做策应，佢同古路施夫斯基都交出助攻，「孙仔」更省两粒，最终反胜5比1，火力全开。

　　热刺依家与少踢一场嘅北伦敦死敌阿仙奴同分，仅凭较佳得失球升上第4位，为争下届欧联入场券，往後联赛不容有失，造访态沉嘅维拉，一定趁机踩多两脚，客胜咪错过。